المهندس حديث التخرج بالموقع
بسم الله الرحمن الراحيم والصلاه والسلام على رسول الله صلى الله عليه وسلم .
هتكلم معاكم النهارده عن موضوع مهم كل واحد فينا مر بيه لما كان مهندس حديثى التخرج بالموقع .....صلى على النبى .
فى البدايه لو حضرتك او حضريتك أول مره تنزل الموقع كمهندس مسئول بمعنى بدأت الحياه العمليه الفعليه لازم تكون عارف أنك مش هتكون ملم بكل حاجه وده حاجه طبيعيه جدا ومتقلقش منها خاااااااااااالص .
بس فيه حجات حابب أتكلم معاكم فيها .........
أول محضرتك تنزل الموقع لازم تشوف وتسمع أكتر بكتيييييير متتكلم ..
طب ليه ياهندسه ....... هقولك ياهندسه .
لأن فالفتره ده مهمه جدا بالنسبالك كمهندس لسه جديد وكل كلمه هتتكلمها هتتحسب عليك ومن خللها هتتعرف شخصيتك وكمان قلت الكلام بتخلى ليك هيبه وسط العمال والصنايعيه فالبدايه بس .
طب ليه كل ده ياهندسه فهمنى .
فالفتره ده فالبدايه هتتبتدى تلاحظ وتشوف الصنايعيه والعمال وتشوف مين اللتقدر تعتمد عليه ومين لا ده بالإضافه أنك بتكتسب الخبره بتعتك كمهندس بالموقع ده بخلاف طبعا
المهندسين الزملاء اللممكن تستفيد من خبراتهم السابقة .
خلى بالك
لو عاوز تكون مهندس شاطر وفاهم فشغلك أوعى تقعد على مكتبك غير لما تكون ملم بكل حاجه لأن المعلومه مش هتجيلك وأنت قاعد على مكتبك .
ونصيحىى منى لو أنت ياهندسه عاوز تكون مهندس مكتب فنى أو ديزين أو إداره مشروعات أو أستيل الأفضل أنك تبدأ مهندس موقع كبدايه لو أتيحت الفرصه .
طب ليه ياهندسه أشمعنا ..... هقولك ياهندسه... صلى على النبى .
الموقع بيضيف ليك حجات كتير ومش كده وبس ده بيخليك تتخيل حجات أنت مبتكنش متخيلها لو أنت مهندس ديزين مثلا بيخليك بعد
كده تكون عارف أنك حاطط مثلا الكمره ده فالمكان ده ليه بتكون فاهم ومقتنع بالتصميم بتاعك .
ياهندسه طب أنا مهندس لسه حديث تخرج ومفيش معايا مهندس أكبر منى يفيدنى أو معايا مهندس بس مش عاوز يفدى أعمل أيه :
هقولك ياهندسه بس صلى على النبى الأول ....
أحسن معلومه تقدر تستفيد بيها وتفضل معاااااك على طول المعلومه اللتخدها بصعوبه وتجتهد عشان توصلها .
وخلى بالك الموقع
هيزيد خبرتك مع الوقت وهقولك كمان عندك اليوتيوب فيها دورات أعداد مهندس مدنى موقع وغيرها تقدر تستفيد بيها إن شاء الله .
وحاول ياهندسه لما تكون فالموقع وفيه حاجه مش عارفها وعاوز تستفسر عنها حاول تخدها بس متحسس الصنايعى ان المعلومه نقصاك عشان متصغرش فنظره ...... وخلى بالك فيه صنايعيه محترمه جدا وبيحبوا يفيدوا وده هيرجعلك أنته ياهندسه .
أزاى ياهندسه انا مش فاهم الصراحه ..... هقولك صلى على النبى .
من المهم جدا أن يكون فيه علاقه كويسه بين حضرتك كمهندس وبين الصناعيه والعمال وكده علاقه كلها أحترام وفنفس الوقت متخليش حد يتخطى حدوده معاك ياهندسة. .الصنايعى لو حبك هيديك عينه وأفضل المعلومات تخدها من الصنايعى مع أحترامنا
للدكاتره المهندسين وزملائنا المهندسين الكبااااار.
حاجه أخيره حابب أتكلم فيها أنت كمهندس خبرة وجايلك مهندس حديث تخرج متبخلش عليه بالمعلومه هوه مش هياخد مكانك على فكره وأفتكر انك كنت مهندس حديث تخرج ولقيت اللياخد بأيدك ويفهمك ويعلمك ....أنت متعرفش ربنا بيسترها معاك عشان خاطر
أيه ولا ربنا بيباركلك عشان خاطر بتساعد مين لوجه الله .
تخيل ياهندسه لما تفيد حد بمعلومه كل لما يفيد حد بالمعلومه بتعتك ده هتاخد حسنااااااات فتخيل بقا يمكن تكون الحسنات ده تدخلك الجنه .......... وشكرا
قال رسول الله صلى الله علية وسلم
(إذا مات إبن أدم أنقطع عمله إلا من ثلاث صدقة جارية أو علم ينتفع به أو ولد صالح يدعوا له )
صدق رسول الله صلى الله علية وسلم .
تعليقات: 0
إرسال تعليق